Хэнтий, Хангай, Монгол дагуур, Хянган, Ховд, Монгол Алтай, Дундад Халх, Дорнод Монгол, Их нууруудын хотгор, Олон нуурын хөндий, Дорнод говь, Говь-Алтай, Зүүн гарын говь болон Дундговь аймгийн бүх нутагт ургана. Толгодын бударганыг ургаж байх үед мал дуртайяа иднэ. Малын бэлчээр, уул толгод, хайрга чулуутай сайрын элстэй ёроол, тариа ногооны талбай, айлын бууцан дээр хогийн ургамалтай холилдон ургахаас гадна тарвагны дош, зам, шуудууны хөвөөгөөр ч таардаг бэлчээрийн гоц ашигтай ургамал. Гэхдээ баргийн хүн үүнийг нь мэддэггүй. Хаа сайгүй ургадаг болохоор нь хогийн ургамалтай андуурна. Дасан зохицох чадвар сайтай, гангийн халуун нарыг ч гайгүй сайн тэсвэрлэдэг энэ ургамал өнгөн хэсэгтээ элсжсэн буюу сул элсэнцэр хөрстэй заримдаг цөл ба хуурай атар хээр нутгаар элбэг тархжээ. Бударгана дотроо нэлээд хэдэн төрөл байдаг ба тэдгээрийн хоёр нь бэлчээрийн төдийгүй эмийн үйлдвэрлэлд ашигтайг одоогоор тогтоогоод байгаа. Шинэсэрхүү бударганаар дархлаа сэргээх үйлчилгээтэй, ядаргаанд ялагдашгүй “Салимон”-ыг бүтээсэн бол толгодын бударганы элэг хамгаалж, хүний бие дэх хорыг хөөж гадагшлуулдаг чадварыг нь ашиглан, элэг хамгаалж хоргүйжүүлэх үйлчилгээтэй цай хийжээ.